جنوبی بھارتی فلموں کی مشہور جوڑی رشمیکا مندانا اور وجے دیوراکونڈا 26 فروری کو شادی کے بندھن میں بندھنے جا رہی ہے۔ شادی سے قبل دونوں کی دولت اور اثاثوں کی تفصیلات سامنے آگئی ہیں جن کے مطابق ان کی مجموعی دولت 130 کروڑ روپے سے زائد ہے۔ مداح خاص طور پر رشمیکا اور وجے کی مجموعی دولت کے بارے میں جاننے میں دلچسپی لے رہے ہیں کیونکہ یہ جوڑی ٹالی وڈ کی مقبول ترین شخصیات میں شمار ہوتی ہے۔
رشمیکا مندانا جنوبی بھارت کی سب سے زیادہ معاوضہ لینے والی اداکاراؤں میں شامل ہیں۔ انہوں نے پشپا: دی رائز اور اینیمل جیسی بڑی فلموں میں کام کیا۔ رپورٹس کے مطابق ان کی ذاتی دولت تقریباً 66 کروڑ روپے ہے اور وہ ایک فلم کے لیے اوسطاً 4 کروڑ روپے معاوضہ وصول کرتی ہیں۔ فلموں کے علاوہ وہ برانڈ تشہیر اور اپنے پرفیوم برانڈ سے بھی آمدن حاصل کرتی ہیں۔
رشمیکا کے پاس بنگلورو، حیدرآباد، ممبئی، گوا اور کورگ میں جائیدادیں موجود ہیں۔ کورگ میں ان کا ولا تقریباً 8 کروڑ روپے مالیت کا بتایا جاتا ہے۔ ان کی گاڑیوں میں رینج روور اسپورٹ، آڈی کیو تھری اور مرسڈیز بینز شامل ہیں، جو ان کے لگژری طرزِ زندگی کی عکاسی کرتی ہیں۔
مزید پڑھیں: ایشوریا کے 400 کلو زیورات کی سخت حفاظت پر پانچ گارڈز تعینات
دوسری جانب وجے دیوراکونڈا کی دولت 66 سے 70 کروڑ روپے کے درمیان بتائی جاتی ہے۔ وہ ایک فلم کے لیے 12 سے 15 کروڑ روپے معاوضہ لیتے ہیں۔ اس کے علاوہ وہ برانڈ تشہیر اور سوشل میڈیا سے بھی اچھی خاصی کمائی کرتے ہیں۔ وجے حیدرآباد کے پوش علاقے جوبلی ہلز میں تقریباً 15 کروڑ روپے کے بنگلے میں رہتے ہیں اور ان کے پاس بی ایم ڈبلیو، فورڈ مستنگ اور رینج روور جیسی مہنگی گاڑیاں موجود ہیں۔ رپورٹس کے مطابق وہ ایک نجی طیارے کے بھی مالک ہیں جس کی مالیت تقریباً 30 کروڑ روپے ہے۔
دونوں کی مشترکہ دولت 130 کروڑ روپے سے زیادہ بتائی جاتی ہے، جس کی وجہ سے یہ جوڑی ٹالی وڈ کی امیر ترین نوجوان شخصیات میں شامل ہو چکی ہے۔ شادی کی تقریبات 24 سے 26 فروری تک دی مومینٹوس میں جاری ہیں جو اراؤلی پہاڑیوں میں واقع ایک نجی مقام ہے۔ مداح شادی کی خبروں کے ساتھ ساتھ رشمیکا اور وجے کی مجموعی دولت پر بھی بھرپور گفتگو کر رہے ہیں۔
